नयाँदिल्ली: इन्डियन प्रिमियर लिग (आइपिएल) अन्तर्गत आइतबार भएका खेलमा गुजरात टाइटन्स र सनराइजर्स हैदरावादले जित हात पारेका छन् । गुजरातले चेन्नई सुपर किंग्सलाई तीन विकेटले हराउँदा हैदरावादले पञ्जाव किंग्समाथि ७ विकेटको जित हात पारेको हो । आइतबार भएको पहिलो खेलको सुरुमा ब्याटिङ गरेको पञ्जावले निर्धारित २० ओभरमा सबै विकेट गुमाएर १५१ रन बनाएको थियो । पञ्जावका लागि लियाम लिभिङस्टोनले सर्वाधिक ६० रन बनाउनुभयो । हैदरावादका एमरान मलिकले चार तथा भुवनेश्वर कुमारले तीन विकेट लिनुभयो ।
जवाफी ब्याटिङमा उत्रिएको हैदरावादले तीन विकेटको क्षतिमा सात बल बाँकी छँदै लक्ष्य पूरा गरेको थियो । त्यस्तै, अर्को खेलमा सुरुवाती ब्याटिङ गरेको चेन्नईले निर्धारित २० ओभरमा पाँच विकेटको क्षतिमा १६९ रन बनाउँदै गुजरातलाई १७० रनको लक्ष्य दिएको थियो । चेन्नईका रुटुराज गाइक्वाडले ७३ र अम्बाती रायडुले ४६ रनको पाली खेल्नुभयो । जवाफी ब्याटिङमा उत्रिएको गुजरातका लागि डेभिड मिलरले अविजित ९४ रनको महत्वपूर्ण पाली खेल्दै जित दिलाउनुभयो ।
चेन्नईका लागि जारी आइपिएलमा यो पाँचौंँ हार हो । ६ खेलबाट उसले केवल दुई अंक जोडेको छ । चेन्नई तालिकाको नवौँ स्थानमा छ । लिगको शीर्षस्थानमा रहेको गुजरातले समान ६ खेलबाट १० अंक जोडेको छ । यसैबीच आइपिएलको यो सिजन पनि बीचमै रोकिन सक्ने जोखिम बढेको छ । पछिल्लो समय दिल्ली क्यापिटल्सका खेलाडीमा कोरोना भाइरस पोजिटिभ देखिएको छ । इएसपिएन क्रिकइन्फोका अनुसार पछिल्लो पटक थप दुईजना खेलाडी पोजेटिभ देखिएका छन् । एक खेलाडी विदेशी भएको बताइएको छ ।
पछिल्लो समय भारतमा बढ्दै गएको कोरोना संक्रमणको संख्या आइपिएलमा समेत देखिएको छ । हालै दिल्ली क्यापिटल्सका एक अफिसियलमा कोरोना देखिएको थियो । त्यसलगत्तै दुई खेलाडीमा समेत कोरोना संक्रमण देखापरेको छ । यसले प्रतियोगिता बीचमै रोकिन सक्ने जोखिम बढाएको बताइएको छ । गत सिजन पनि कोरोना संक्रमणका कारण प्रतियोगिता बीचमै रोकिएको थियो । पछि लिगको दोस्रो चरण युएइमा गरिएको थियो ।
पहिलो पटक दिल्लीका फिजियो प्याट्रिक फरहार्टमा कोरोना पोजिटिभ देखिएको थियो । अब, उहाँसँगै एक खेलाडीमा समेत कोरोना देखिएको हो । उहाँको नाम भने सार्वजनिक गरिएको छैन । अघिल्लो सिजनको आइपिएल कोरोनाकै कारण संयुक्त अरब इमिरेट्स (युएई)मा सारिएको थियो । भारतमा बन्द रंगशालामा खेल गराउँदासमेत कोरोना संक्रमण देखिन थालेपछि खेल युएईमा सारिएको थियो ।
