काठमाडौँ- राष्ट्र बैंकका गभर्नर महाप्रसाद अधिकारीले आफू कुनै पनि राजनीतिक दलको सदस्य नरहेको बताएका छन् । नेकपा एमाले अर्थ तथा योजना विभागमा एम अधिकारी (खोटाङ) को नाम सार्वजनिक भएपछि गभर्नर अधिकारीको नाम जोडेर वाद विवाद भइरहेको छ । ‘स्पष्टै छ म कहीं कतै कुनै पार्टीको सदस्यता लिएको छैन, मेरो नाम उहाँहरु (पार्टी) ले कसरी राख्नुभयो, त्यसमा स्पष्ट पार्न भनेको छु,’ गभर्नर अधिकारीले बुधबार साँझ इकागजसँग भने, ‘उहाँहरुले दिनु पनि भएको छ, मैले बाहिर सार्वजनिक नगरेको मात्रै हो ।’
आफू कुनै पनि पार्टीको सदस्य हुने कुरै नभएको उल्लेख गर्दै गभर्नर अधिकारीले भने, ‘यस्तो पद (राष्ट्र बैंक गभर्नर) मा बसेको व्यक्तिले पार्टीको समितिमा बस्ने कुरा पनि हुन्छ र ?’
बेला बेला यस्ता विषय बाहिर आइरहे पनि आफूलाई कुनै सरोकार नभएको पनि गभर्नर अधिकारीले बताए । ‘यसभन्दा अघि पनि यस्तै कुरा उठेको थियो, त्यसैगरी उहाँहरुलाई कम्प्लेन (गुनासो) गरी के हो यो ? के गर्न लागेको ? म यो पार्टीमा छैन भनेको थिएँ । त्यतिबेला पनि उहाँहरुले तपाईं होइन भनेर क्लियरेन्स दिनुभएको थियो ।’
उनले आफू कुनै पनि राजनीतिक दलको सदस्य हुने भन्ने कल्पनै गर्न नसक्ने कुरा भएको पनि उल्लेख गरे ।
