काठमाडौँ: भारतको जवाहरलाल नेहरू विश्वविद्यालय (जेएनयू)मा वामपन्थी छात्र संगठन अल इन्डिया स्टुडेन्ट्स एसोसिएसन (आईसा) र हिन्दूवादी छात्र संगठन अखिल भारतीय विद्यार्थी परिषद् (एबीभीपी)बीच झडप भएको छ ।
एबीभीपीका छात्रहरूले रामनवमीको दिन विश्वविद्यालयको छात्रवासमा मांसाहार गर्न रोक्न खोज्दा झडप भएको समाचार संस्था द हिन्दूले जनाएको छ । झडपमा आफ्नो संगठनका केही कार्यकर्ता घाइते भएको आईसाले दाबी गरेको छ ।
एबीभीपीसम्बद्ध विद्यार्थीहरूले होस्टलमा रामनवमी पूजा गरिरहेको समयमा मांसाहारका लागि मासु ल्याएपछि त्यसलाई रोक्न खोज्दा झडप भएको दी इन्डियन एक्सप्रेसले उल्लेख गरेको छ । अहिले दुवै पक्षका विद्यार्थीहरू शान्तिपूर्ण रुपमा प्रदर्शन गरिरहेको र आइतबार बेलुकाको झडपको विषयमा कानुनी अनुसन्धान अघि बढाइसकिएको डीसीपी मनोज सीलाई उद्धृत गर्दै दी इन्डियन एक्सप्रेसले बताएको छ ।
एबीभीपी पक्षधर विद्यार्थीहरूले आफ्नो पक्षका विद्यार्थी पनि घाइते भएको जनाउँदै केही समयअघिदेखि आईसा पक्षधर विद्यार्थीहरूले झडप गराउने योजना बनाइरहेको आरोप लगाए । झडपपछि एबीभीपी सम्बद्ध विद्यार्थीहरूले ‘भगवान् श्रीरामको अपमान सहँदैनौं’ भन्दै विरोध गरेको बीबीसी हिन्दीले जनाएको छ ।
स्टुडेन्ट्स फेडेरेसन अफ इन्डिया (एसएफआई) सम्बद्ध एक विद्यार्थीका अनुसार विद्यार्थीहरू खाना खाइरहेको समयमा एबीभीपीनिकट अभियान्ता लाठी‚ इँटासहित होस्टेलको मेसमा पसेपछि झडप सुरु भएको थियो ।
झडपमा परी गम्भीर चोट लागेका कारण सोसियोलोजीमा स्नातकोत्तर गरिरहेकी अख्तरिस्त अन्सारीलाई अल इन्डिया इन्स्टिच्युट अफ मेडिकल साइन्सेस (एआईआईएमएस)को ट्रमा सेन्टरमा भर्ना गरिएको छ । झडप आइतबार राति साढे ७ बजेबाट सुरु भएको जनाइएको छ ।
यसअघि सन् २०२० जनवरी ५ मा रड‚ लाठीसहित जेएनयूमा छिरेको मास्कधारी करिब १ सय जनाको समूहले विद्यार्थी‚ शिक्षक र कर्मचारीलाई कुटपिट गरेको थियो । त्यसविरुद्ध एफआईआर दर्ता भए पनि अहिलेसम्म कसैलाई कारबाही गरिएको भने छैन ।
