कविताः फूलबुट्टे सारी- सुरेन्द्र चौहान

( १ )

फूलबुट्टे सारी सपक्क पारी लाएर आइछौ
ढिंडो र गुन्द्रुक नेपाली खाना खाएर आइछौ ।

( २ )

त्यो लामो केश कम्मरसम्म छोडेर आइछौ
बारीका डिलमा रोपेका मकै गोडेर आइछौ ।

( ३ )

लजालु स्वभाव नशालु आँखा पारेर आइछौ
गाईको घिउ कन्तीमा हाली खारेर आइछौ ।

( ४ )

ओडेर घुम्टो हसिलो मुहार लिएर आइछौ
त्यो चोखो माया अन्त कतै दिएर आइछौ ।

( ५ )

गालामा लाली ओठमा हाँसाे बोकेर आइछौ
चोरीको डरले मनमा ताल्चा ठाेकेर आइछौ ।

( ६ )

नयाँ साल बनी सुटुक्क यहाँ लुकेर आइछौ
पोहोर भन्दा अहिले त झन सुकेर आइछौ ।