काठमाडौँ: दीपेन्द्रसिंह ऐरी ट्वान्टी २० अन्तर्राष्ट्रियमा शतक बनाउने चौथो नेपाली खेलाडी बनेका छन् । उनको अविजित १ सय १० रनमा नेपालले मलेसियालाई त्रिकोणात्मक ट्वान्टी २० शृंखलामा शनिबार २ सय २४ रनको लक्ष्य दिएको छ ।
शनिबार त्रिवि क्रिकेट मैदान कीर्तिपुरमा मलेसियाले टस जितेपछि पहिला ब्याटिङमा आएको नेपालले निर्धारित २० ओभरमा ४ विकेट गुमाई २ सय २३ रन बनाएको हो । ट्वान्टी २० अन्तर्राष्ट्रियमा नेपालको यो तेस्रो उच्च स्कोर हो ।
नेपालबाट यसअघि ट्वान्टी २० अन्तर्राष्ट्रियमा पारस खड्का, ज्ञानेन्द्र मल्ल र कुशल भुर्तेलले शतक बनाएका थिए । दीपेन्द्रले अन्तिम ओभरमा लगातार दुई छक्का प्रहार गर्दै आफ्नो शतक पुरा गरेका थिए । उनले ५७ बलको इनिङ्समा १० चौका र ६ छक्का प्रहार गरे ।
दीपेन्द्र र रोहित पौडेलले तेस्रो विकेटमा ९६ रनको साझेदारी गरे । रोहित ३४ बलमा ५१ रन बनाई आउट भए । उनले ५ चौका प्रहार गरे । ट्वान्टी २० अन्तर्राष्ट्रियमा यो उनको पहिलो अर्धशतक हो ।
ओपनरद्वय कुशल भुर्तेल र आसिफ शेख क्रमशः १२ र १८ रनमा आउट भएका थिए । रोहित आउट भएपछि आएका आरिफ शेखले २ रनमात्र बनाउन सके । इनिङ्सको अन्तिम बलमा रनआउट भएका मोहम्मद आदिल अलामले ९ बलमा १४ रन बनाए ।
