काठमाडौं । अमेरिकी कम्पनी फाइजरले कोभिड–१९ विरुद्धको खाने औषधि बनाएको छ। फाइजरले यो औषधिको प्रयोगको लागि अनुमति दिन नियामकसमक्ष आवेदन दिएको छ। फाइजरको परीक्षणमा रहेको यो औषधि सफल भए यसलाई घरमै लिन सकिन्छ।
फाइजरले अहिले बनाइएको औषधिले ठूलो मात्रामा कोरोना संक्रमणपछि अस्पताल भर्ना हुने मानिसको संख्यालाई घटाउने दाबी गरिएको छ। अमेरिकाको फुड एण्ड ड्रग एड्मिनिस्ट्रेसनले यसअघि नै यो औषधिबारे अध्ययन गरिरहेको छ।
आगामी दिनमा अन्य साना औषधि निर्माताले पनि कोभिड–१९ को औषधि निर्माण गर्ने अपेक्षा छ। फाइजरका सीईओ अल्बर्ट बोउर्लाले कम्पनीले कोभिड–१९ को उपचार अब मानिसको हातहातमा पुर्याउने प्रयास गरेको बताएका छन्।
विशेषगरी फाइजरले यो औषधि सामान्य कोरोना संक्रमण देखिएका र गम्भीर समस्या देखिने जोखिम भएका मानिसको लागि ल्याएको हो। यो औषधि पनि अन्य औषधिजस्तै लिन सकिन्छ। अहिलेसम्म अमेरिकाले कोभिड–१९ को खाने औषधिलाई मान्यता दिएको छैन।फाइजरले आफ्नो औषधिले अस्पताल भर्ना हुने र कोभिड–१९ बाट मृत्यु हुनेको संख्या ८९ प्रतिशतले घटाउने दाबी गरेको छ।
