काठमाडौं- प्रदेश एकमा मुख्यमन्त्रीमा दाबी पेस गर्ने समय आज १ बजे सकिँदैछ। प्रदेश प्रमुख सोमनाथ अधिकारी प्यासीले मुख्यमन्त्रीका लागि सोमबार आह्वान गरेका थिए। उनले आज १ बजेसम्म मुख्यमन्त्रीको दाबी पेस गर्न समय उपलब्ध गराएका छन्।
‘मुख्यमन्त्री भीम प्रसाद आचार्यले नेपालको संविधानको धारा १६९ को उपधारा (१) को खण्ड (क) बमोजिम मिति २०७८/०७/१५ गते माननीय प्रदेश प्रमुख समक्ष लिखित राजीनामा दिनुभएकोले नेपालको संविधानको धारा १६८ को उपधारा (२) बमोजिम प्रदेश सभामा कुनै पनि दलको स्पष्ट बहुमत नरहेको अवस्थामा प्रदेश सभामा प्रतिनिधित्व गर्ने दुई वा दुईभन्दा बढी दलहरुको समर्थनमा बहुमत प्राप्त गर्न सक्ने प्रदेश सभाको सदस्यलाई मिति २०७८/०७/१६ गते मंगलवार दिनको १:०० बजेभित्र प्रदेश १ को मुख्यमन्त्री पदमा नियुक्ति गर्ने प्रयोजनका लागि आफ्नो दावी पेश गर्न आव्हान गर्नुभएको छ’ विज्ञप्तिमा भनिएको छ।
