रुपन्देही । भैरहवास्थित निर्माणाधीन गौतमबुद्ध विमानस्थलको भौतिक निर्माणको काम अन्तिम चरणमा पुग्दै गर्दा संस्कृति, पर्यटन तथा नागरिक उड्डयन मन्त्री योगेश भट्टराईले विमानस्थलको निरीक्षण गरेका छन्।
कोरोना संक्रमणको महामारीकै बीचमा शुक्रबार विमानस्थलको निरीक्षणका लागि आएका मन्त्री भट्टराईले कोरोना संक्रमणकाबीच पनि विमानस्थलको निर्माण नरोकिएकोले डिसेम्बरसम्म सकिने विश्वास व्यक्त गरे।मन्त्रालयको जिम्मेवारी लिएलगत्तै विमानस्थलको निर्माणप्रति निरन्तर चासो राख्दै आएका भट्टराई नियमित रुपमा विमानस्थल निरीक्षणको लागि आउने गरेका छन्। उनले केही उपकरण र जडान गर्ने दक्ष जनशक्ति कोरोनाकै बीच पनि ल्याउने तयारी गरिएको बताए।
नेपाल सरकारले निर्माण गरिरहेका २१ वटा राष्ट्रिय गौरवको आयोजना अन्तर्गत गौतमबुद्ध विमानस्थल पनि एक हो। ति सबै आयोजनाभन्दा यो विमानस्थल सबैभन्दा छिटो सम्पन्न हुने मन्त्री भट्टराईले बताए। उनले विमानस्थल निर्माण सकिएपछि तत्कालै संचालनमा आउने बताए। नागरिक उड्डय प्राधिकरणका महानिर्देशक राजन पोखरेलले उपकरण जडानका लागि दक्ष जनशक्ति तत्काल आए डिसेम्बरमै निर्माण सकिने र त्यसपछि अन्तर्राष्ट्रिय उडान संचालनका लागि प्रमाणीकरण गर्ने गरी काम अघि बढेको बताए।
विमानस्थल निर्माण आयोजना प्रमुख प्रवेश अधिकारीले लकडाउनमा पनि आयोजनाका थुप्रै काम भएको बताए। एयर कन्डिसनसँग सम्बन्धित चिनियाँ कामदार लकडाउनका कारण राेकिएपछि उपकरण जडानका लागि अमेरिका, अष्ट्रिया, थाइल्याण्ड लगायतका मुलुकबाट पनि जनशक्ति ल्याउनु पर्ने उनको भनाइ छ।
विमानस्थलमा अहिले टायल विछ्याउने, कन्ट्रोल टावर, टर्मिनल भवनमा फिनिसिङ र सामान्य उपकरण जडान, विद्युतीकरण, भवनहरु फिनिसिङको काम भइरहेको छ। आयोजना प्रमुख अधिकारीले दक्ष जनशक्ति नआउँदासम्म ठूला उपकरण जडानको काम हुन नसक्ने बताए।
विमानस्थलको अहिलेसम्म ९२.५ प्रतिशत काम सम्पन्न भएको अधिकारीले बताए। सन् २०१५ को सुरुमा थालनी भएको विमानस्थलको निर्माण कार्य सन् २०१७ डिसेम्बरभित्र सक्नेगरी सम्झौता गरिएको थियो। हाल पाँचौ पटक म्याद थप गरी २०२० को डिसेम्बरसम्म पुर्याइएको छ। एशियाली विकास बैंकको सहुलियतपूर्ण ऋणमा चिनियाँ ठेकेदार कम्पनी नर्थवेष्ट सिभिल एभिएसनले निर्माण गरीरहेको विमास्थलको दुवै चरणमा गरी सात अर्ब ३२ करोड रुपैयाँ हाराहारी खर्च हुने प्राधिकरणले जनाएको छ।
