२७ जेठ, काठमाडौं । अन्तर्राष्ट्रिय क्रिकेट काउन्सिल (आईसीसी) ले कोरोना भाइरसको असरलाई मध्यनजर गर्दै क्रिकेट खेलको केही नियममा अस्थायी परिवर्तन गरेको छ ।
कोभिड १९ को कारण उत्पन्न जोखिम कम गर्न अनि खेलाडी र म्याच अफिसिलयहरुको सुरक्षालाई कायम राख्न नयाँ नियम प्रस्ताव गरिएको थियो । जसमा बल टल्काउन थुक प्रयोग गर्न नपाइनेदेखि लोकल अम्पयार राख्नेसम्म प्रस्ताव थियो ।
अनिल कुम्बलेको नेतृत्वमा रहेको आईसीसी क्रिकेट कमिटीले नियमको अस्थायी परिवर्तन सम्बन्धी गरेको प्रस्तावलाई मंगलबार स्वीकृत गरिएको आईसीसीले जनाएको छ ।
कोभिड१९ रिप्लेसमेन्ट अन्तर्गत खेलाडीको लक्षण देखिए टिमले खेलाडी परिवर्तन गर्न पाउनेछन् । यो टेष्ट क्रिकेटमा मात्र लागू हुनेछ ।
यसैगरी अन्तर्राष्ट्रिय क्रिकेटको सबै फर्म्याटमा न्युट्रल अम्पायर राख्नैपर्ने बाध्यतालाई हटाइएको छ । आईसीसीले इलाइट प्यानल र इन्टरनेशनल प्यानल म्याच अफिसियलबाट लोकल म्याच अफिसियल छान्न पाउनेछ ।
यस्तै खेलाडीले क्रिकेट बल टल्काउन थुक लगाउन नपाउने भएका छन् । त्यस्तो गरेमा अम्पाएरले त्यो परिस्थितिलाई मिलाउनुपर्नेछ । एक टिमलाई त्यस्तो गरेको पाइएमा दुई पटक चेतावनी दिइनेछ ।
