काठमाडाै । साउन ८ गते सम्मका लागि संसद स्थगित भएपछि कांग्रेस सांसदहरुले संसदीय समितिको बैठक समेत स्थगित गर्न माग गरेका छन् । सांसदहरुलाई बाढी पीडितको सहयोग गर्न जिल्ला जानुपर्ने भएपछि संसद स्थगित भएपछि सांसदहरुले समिति पनि स्थगित गर्न माग गरेका हुन् ।
आज बसेको राज्य व्यवस्था समितिको बैठकमा कांग्रेस सांसदहरुले एक साताका लागि बैठक स्थगित गर्न माग गरेका छन् । बाढी, पहिरो र डुबान पीडितका लागि राहत दिन निर्वाचन क्षेत्रमा जानुपर्ने भन्दै एक हप्ता बैठक स्थगित गर्न समितिका सभापति शशि श्रेष्ठसँग माग गरेका थिए । पीडितलाई साथ दिन आ– आफ्नो निर्वाचन क्षेत्रमा जानका लागि प्रतिनिधिसभा बैठक स्थगित भएकाले संसदीय समितिको बैठक पनि स्थगित हुनुपर्ने सांसदहरुको तर्क छ ।
जनता पीडामा रहेका बेला राहत तथा उद्दारमा सांसदहरु आफ्नो निर्वाचन क्षेत्रमा जानुपर्ने भएकाले संसदीय समितिको बैठक बोलाउन नहुनेतर्फ पनि समितिकी सभापति श्रेष्ठको ध्यानाकर्षण गराएका थिए ।यता, सत्तारुढ नेकपाका सांसदहरुले भने कानून निर्माणको काममा ढिलाई हुने दावी गर्दै प्रतिनिधिसभा बैठक स्थगित भएपनि संसदीय समितिका बैठकहरु भने स्थगित गर्न नहुने धारणा राखेका थिए ।
